盧凱彤（Ellen）8月5日離世至今個多月，其台灣攝影師太太余靜萍、好友及工作夥伴積極生活下去，好似何韻詩噚晚就喺Ig story貼咗張林二汶，笑晒攞住個燈籠玩嘅相，而佢就同Ellen生前愛貓蘇菲影咗兩張合照，阿詩仲模仿蘇菲講嘢，留言話：「過主啦～我今日唔簽名唔影相啊！」

今年15歲嘅蘇菲同Ellen感情要好，Ellen生前更曾經自爆，蘇菲試過幾救過佢一命，試過喺佢憂鬱症發作自賤時，走到佢身邊望住佢，令佢覺得自己要好好活下去。Ellen又講過，曾經想將所有愛貓一同遷到台灣住，但因為入境後貓兒要隔離21日觀察才能入境，Ellen為免年事已高的蘇菲身體未能支持，所以放棄移民大計，惜現在她還是先行一步……

由於Ellen嘅fans同網民對幾隻貓咪嘅去向都相當關注，所以何韻詩貼相後，網民都好大反應，唔少人都留言話好開心見到蘇菲，有人話覺得蘇菲瘦咗，又有人感激何韻詩代Ellen照顧蘇菲婆婆，也有網民關心其餘三隻貓，包括Thom Thom、DJ及Juno去向。

今日《蘋果》聯絡過何韻詩，問她係咪收養咗Ellen愛貓？阿詩透過助手回覆稱：「冇收養到，暫時由Ellen朋友，或者佢太太喺香港時照顧住。」至於會否為貓貓再尋家、還是會由余靜萍帶回台灣照顧？阿詩就稱未有決定。