來自南非的年輕騎師麥偉利唔識風水，不過佢就有一項「旺門數據」，原來佢現時居住的騎師宿舍四樓單位，對上一位住客正是紅到發紫的雷神莫雷拉。

莫雷拉於7月中離港後，呢個「旺宅」曾經進行為期大約五星期大裝修。麥偉利在8月初抵港時仍未完工，要入住利敬國所居於同一棟樓的一個面積2,000幾呎宿舍單位。

當時「雙利」曾短暫同居，直至8月24日下午，麥偉利終於搬入上述「旺宅」。

對於「旺宅」環境，麥偉利讚不絕口，仲話希望可以好似上手住客莫雷拉一樣，贏馬停不了。

雷神上季首日（17年9月3日）賽事即贏五場，好多馬迷依然回味無窮，即管睇吓麥偉利呢位新住客有冇佢咁叻仔。

至於利敬國所住單位，對上一位長住的騎練人物，就係已返回歐洲發展的練馬師孫達志。

究竟利敬國最終在港大紅大紫，還是黯然而退，就要睇佢自己造化嘞！