港股昨日繼續反覆下跌，收報15143，跌35點，埋單計，指數跌幅唔算大。但散2成以上嘅窩輪，足足有36隻，有啲係9月尾到期嘅末日輪，有啲10月頭幾日到期。
其實，10月頭到期嘅輪，同9月尾到期嘅，相差好少，不過心理上「10月到期」好似比「9月尾到期」嘅，長多1個月。
有炒輪輸家話，發行商特登將一啲輪嘅到期日，擺係月頭幾日，令屆滿期「睇落」長多1個月，呢招叫做「掩眼法」。
發輪商好唔好大家商量一下，以後發輪，屆滿期統一訂喺每個月份最後1日，方便吓炒家炒輪時比較？
中企指數C輪8隻與P輪7隻，同喺本月29日到期，昨日最後買賣，好幾隻上咗龍虎榜（P輪），及上咗死火榜（C輪）。

中企窩輪大部份喺今年3月發行，當時至今，國指變化不大，但所有C輪與P輪當時至今「一體香」，理由係溢價冇晒。發行時槓桿率愈大，香得愈緊要。
C輪3776香12%，最小，原因係隻輪喺1月份發行，當時國指較低。
P輪3780香得最勁，跌幅達96%，亦係因為𠵱家國指高過當時國指。
炒C輪輸炒P輪又輸，係好多炒輪者嘅經驗。
章盛