甄詠珊今日喺商台宣傳新歌《重新出發》，佢透露呢首歌以頭髮做主題，以前嘅人係長髮為君留，女仔會以男友喜好而轉變，不過佢認為現代女性唔應該投其所好，跟自己鍾意嘅人一齊之外，亦都可以有自己嘅風格，佢話：「以前嘅我好遷就男朋友，我可以為感情付出一切，對方係我生命中嘅一切，例如佢鍾意我着斗零踭，我會着足一日同佢行街，就算行到痛、甩晒皮，我都唔出聲，有苦自己知，不過我以後都唔會，分咗手已經兩年幾，我會因為工作先至再着高踭鞋。」

對於甄詠珊喺大台劇集《果欄中的江湖大嫂》中，表現獲好評，甄詠珊開心咁話：「好多人以為我冇化妝、素顏，其實我係化咗醜妝，眉毛粗、化汗斑，對於演戲，除咗三點不露之外，我都豁咗出去，我覺得呢個造型好幫到我。」

精選娛聞，喺晒《娛果》
http://fb.com/appledailyent