【新增內容】

今屆台慶頒獎禮先係由入行廿年、已視TVB為家嘅楊明摘下飛躍進步男藝員獎，跟住男配角得獎者亦令全場好感動——佢係浪子回頭陳山聰。

頒獎前，嘟姐請眾候選人嘅同劇拍檔上台講兩句，姚子羚已經話：「我知你係經歷咗好多嘢，經歷人生嘅迷失，馬拉松令你重新做人，你今晚上唔上到台都好，你係我哋心目中嘅最佳男配角！」講嗰陣已經眼泛淚光。

宣佈陳山聰憑《同盟》得獎一刻，眾候選人包括張振朗、歐瑞偉等都跟他抱抱。陳山聰忍住眼淚，攬完陳展鵬後，再走去女藝員嗰邊同Crazy Runner嘅胡定欣黃智雯等抱抱。直到山聰行咗上台，佢忍住眼淚話：「我想借今晚掌聲俾所有入圍嘅男配角，因為佢哋喺我心目中個個都咁出色，多謝你哋，多謝公司冇放棄過我，令到我有機會重生我嘅人生。」

山聰仲話：「多謝一路喺背後對我有恩嘅兩位伯樂，佢哋叫我好多謝佢，但係我一定要多謝， 樂小姐同珍姐，冇你兩個嘅鼓勵，我一定唔可以企喺個台，多謝台下每一個用過同信任我嘅監製，我仲可以親口多謝JAZZ，仲有一個人我好想多謝，喺我最迷失嘅時候，一直陪伴我，冇離棄我！我會繼續努力，好踏實咁做好每一套戲！」

陳山聰得獎後接受傳媒訪問，仍然十分激動，一講又喊：「好開心，好感動，同好感恩，同埋真係意想不到。我諗住喺馬來西亞攞完之後，香港應該都冇乜機會。因為我曾經坐喺呢個頒獎禮度，好多年……er……嗰一刻係唔識形容，好開心好開心，因為我每次都同自己講，唔會係自己嘅，唔會係自己嘅。」
問到今次拎獎後會否喊一晚？陳山聰笑言唔會。下個目標係結婚？佢笑謂：「下個目標係男主角（笑）。」頭先佢喺台上話想下個目標係同陳展鵬爭男主角，佢話因為大家合作好開心，而且大家一啲經歷都似，「我覺得我哋好有緣份，佢好似我粒幸運星咁，我有今日嘅成績，冇佢喺劇裡面嘅演繹教導，arrange嘅時候，我諗我都冇咁嘅成績。」

至於點同女友慶祝，佢就話未諗到，女友今早同佢講，叫佢唔好咁緊張，頭先節目開場之前又WhatsApp叫佢唔好咁緊張。

精選娛聞，喺晒《娛果》
http://fb.com/appledailyent