中航油當年嚟唔到港上市,改咗去新加坡,初初表現好醒,點知去年中航油「炒油」事件穿煲,中航油沽空石油期貨?衍生工具,竟然輸咗幾十億,直情嚇死人。國企公司去到海外,學乜人沽空石油吖,石油期貨市場嘅對手,大鱷雲集,食人不吐骨,中國公司經驗短淺,死梗。
中航油股價在新加坡股市大跌,跟住停牌,然後被逼清盤,CEO被捕。後遺症嚟嘞,原來有金融機構推出一籃子ELN(通常有五隻股票),幾隻股票之中,有一隻係中航油。此類ELN講明,籃子內某隻股票跌多過10.5%,投資者就要接貨。唉吔,中航油輸清,接貨接到中航油喎,你都知會有乜嘢回報嘅啦,牆紙囉!
證券W聽到,投資者之中,有大戶、有散戶。大戶唔理嘞,散戶就到銀行哭訴:「你哋職員向我推銷ELN,我買咗一萬銀星紙,現在蝕到冇晒,係你呃我唔識,唔知乜嘢叫做ELN……」證券W一聽就心寒,假如呢類散戶組織上街示威,銀行點算?好彩新加坡冇人敢去上街示威嘅啫,如發生在香港,傳媒就有好戲睇咯。證券W問新加坡行家:「銀行點應付?」行家神秘微笑咁話:「新加坡人自有新加坡方法!」