《法國足球》禮拜一公佈佢哋嘅全球最高收入球星名單，頭兩位當然又係基斯坦奴朗拿度（C朗）同埋美斯，而有位中超嘅球星就成功靠天價薪酬，打入第五位。

《法國足球》統計，C朗係過去一年收入最高嘅球員，將佢嘅薪酬、獎金同埋廣告收入加埋晒，呢位效力皇家馬德里嘅葡萄牙球星賺咗8,750萬歐元（約7.4億港元）。排第二嘅係巴塞隆拿射手美斯，過去一年賺咗7,650萬歐元。排第三嘅係美斯隊友尼馬，年收入5,550萬歐元，而第四就係4,100萬歐元嘅加里夫巴利。效力河北華夏幸福嘅阿根廷球星拿維斯就以2,850萬歐元排第五。

除咗球員，《法國足球》仲有做教練嘅排行，曼聯領隊摩連奴以2,800萬歐元排收入榜首，教緊國足嘅納比就以2,350萬歐元排第二。另外，喺法甲賺得最多嘅球員係巴黎聖日耳門中堅堤亞高施華，收入1,440萬歐元。