噚晚港姐招募，葉翠翠同「爛胸」——其實唔係爛，只係甩皮嘅莊思明排排坐。睇相嗰陣，未知大家可覺得有一刻「眼熟」，但又講唔出當中奧妙——是咁的，莊思明，係莊思敏個妹；而葉翠翠，兩年前曾經俾人笑過，佢個樣喺慢慢「變化」之下，「變」到越來越似莊思敏。咦，咁葉翠翠同莊思明個樣，「立」下眼，係咪有啲似呢？唔知莊思明噚晚有冇咁嘅感覺？

之不過細心一睇，其實翠翠又有啲唔同咗0架，例如，面上膠質又重咗，輪廓硬咗，個鼻，仲直過直尺。如果有一隻螞蟻唔小心爬咗上去，一失足，只怕會直摔落地。

05年港姐冠軍出身，翠翠成日俾人傳變臉打假波，由最初扁口扁面+平胸，變成面尖、間尺鼻嘅巨胸女。據知翠翠選港姐嗰陣，已經被傳整容，當時佢仲喺Elite兼職做model，已經係扁口扁面加單眼皮，參選港姐嗰陣忽然靚咗啲；到07年，32A平cup忽然變成34D。

最令人折服嘅係，佢一邊唔認，一邊繼續進化。據聞翠翠最唔滿意個鼻，所以呢幾年裡面，佢個鼻樑慢慢墊高，墊到變成「間尺鼻」。鼻樑經歷板塊移動之下變高，但對眼又冇「同步發展」，變成向外擘，被笑指同莊思敏好似倒模咁。噚晚見翠翠個鼻已經直上加直，唔知幾時先進化完畢？