前晚由於歐美及中國製造業數據都有理想表現，加上歐洲央行行長特里謝表示，不相信歐元區的金融穩定性將再成為問題，並指購債計劃會持續，令投資者憧憬歐央行將擴大現有購債規模，以及維持向市場泵水政策，外圍股市全線上升，帶動中港股市齊齊裂口上升，不過兩爺孫似乎都唔多爭氣，同樣造出高開低收的格局。
如果有睇往績，投資者應該唔會對昨日的表現太意外，美股大升後的交易日，港股通常都跟唔上，因為好多時已有春江鴨在前一日入定貨，大家應該記得前日港股在3點後急升，應是有投資者預先買貨等大升。至於A股，調控之聲始終困擾內地投資者，就到周末，又係怕中央出招之時，有人趁機套利亦正常，加上內地傳媒繪形繪聲話現時有10萬億元熱錢留港，等待殺入內地市場興風作浪，自然令人憂慮中央會比想像中更大力收緊流動性。然而，歐美製造泡沫行動離完成仍有一段距離，反正在低位加了注，除非穿底，否則短線波幅還是閉起眼睛算了。

樓市資金轉換戰場

銀紙越來越唔值錢，除了買股票外，亦有好多人買實物保值，而買樓特別受投資者歡迎，因為既可收租，又可享受升值，不過最近政府推出辣招打壓樓市，不論用家、炒家及投資者都暫時卻步，樓市成交即時大幅減少，亦有不少業主降價求售，因為大家都唔肯定政府這招會有幾大影響，又唔知會否有後着。
不過，在這個追求資產增值的年代，有實力的投資者及炒家自然不甘寂寞，士佳相信資金將會由樓市轉投商舖及寫字樓，睇番近日股市，收租股及房託基金（REITs）都持續強勢，做商舖及寫字樓代理的亦有勢向上，唔係每一個投資者都有能力買舖買寫字樓，看好又想參與其升值潮，上述類別的個股當屬考慮對象。
張士佳
寶來證券（香港）董事　投資服務部
mailto:[email protected]