魚缸前日大升，淡友被挾到鬼殺咁嘈，事關四川大地震令不少散戶主觀以為股市向淡居多。大市昨日出現餘震，一度急跌超過400點，好自然又挑起淡友條筋，結果港股午市掉頭又再挾過。
如果散戶有留意市況，應留意到指數舞上舞落，大戶特別倚重某一兩隻藍籌股，其中建行（939）自成功「染藍」之後，大戶最鍾意用佢來做挾倉工具，若然市況出現大波動，捉到路的散戶都好鍾意短炒建行，如果有十幾格水位，好多人都費事「過夜」，玩「即日鮮」仲爽。

工行（1398）亦一樣深得活躍散戶喜愛，內地有消息指出，工行入股太平保險已屆落實階段，只待披露交易作價。換言之，一切如箭在弦，惟市況波動，建議候保歷加通道中軸線6.06元附近買入，升破橫行區頂部6.33元，上望6.80元。