杜蘭特(KevinDurant)離開雷霆轉投勇士,除咗勇士球迷高興外(其實有唔少勇士迷係擔心),KD真正母會-超音速嘅球迷分分鐘比佢哋更興奮!
話說美國商人ClaytonBennett喺2006年買咗西雅圖超音速後,講過會盡全力留住超音速喺西雅圖,但最終嚟自奧克拉荷馬城嘅Bennett,喺2008年正式搬咗成隊波去佢鄉下,仲改咗隊名叫雷霆,會徽、隊色全部改晒,除咗球員(包括KD)係由超音速帶過去外,基本上係另一支新嘅球隊嚟。
雖然已經過咗咁多年,但一班超音速嘅球迷仍然好憎雷霆。雷霆冇幾耐前喺西決被勇士反勝,當家球星KD仲要去埋對家,真係開心死超音速球迷!以下係部份超音速球迷喺Twitter上嘅留言:
「一啲都唔會同情雷霆球迷,佢哋咁多年嚟笑超音速球迷,仲要話KD係來自西雅圖嘅『禮物』。唔係囉,你哋係搶走佢囉。」
「留意返,當佢哋離開時,我哋冇燒過超音速波衫,我哋仍然驕傲地繼續著緊。」
「杜蘭特離開OKC!抵你死ClayBennett,你呢個大話精、賊仔、偷球會嘅XXX。」
不過,雷霆球迷嘅心就傷透喇!有個細路仔收到呢個消息後非常傷心,喺個泳池到喊咗出嚟,之後仲話好憎KD,想打佢咁話喎!
體蘋果facebook專頁↓↓↓
http://fb.com/appledailysports