楊愛瑾（Miki）今日喺觀塘apm出席可口可樂收藏展，啱啱去希臘旅行返港嘅Miki曬黑咗唔少，問佢去旅行有冇趁機努力造人？Miki話：「嘩，咁私人，呢方面希望順其自然，唔好諗太多。」

Miki成日都喺Ig大晒比堅尼，係咪大膽咗？佢話：「夏天唔好着咁多衫，努力操腹肌，不過呢一個月懶咗。」為咗養好身子，Miki都話要開始增肥，o依家身型咁弗，老公有冇讚先？Miki話：「佢會覺得自己勁啲，好難同佢比。」佢仲話同老公可以鬥肌肉，仲話老公唔介意佢騷努力嘅成果。

講到好姊妹吳雨霏傳有咗喎？Miki話唔知，知道Kary對生BB都係隨緣，會唔會鬥快呀？Miki話：「比賽？好難。」

提到傅穎之前俾人話膠面，喺網上拍咗條化膠妝嘅片，Miki知道就笑住話：「咁正！我冇睇，好大膽，我自己都唔敢唔化妝，不嬲佢化妝係叻，我哋以前搵緊好嘅化妝師時，佢已經鑽研化妝，好叻。」

問Miki覺唔覺對方好膠？佢就話：「唔覺，大個咗，成熟咗，靚咗。大咗點都有少少變啩，17、8歲到o依家，我自己都唔同，細個有babyfat，脹啲，o依家瘦啲，不過好恐怖㗎，一上鏡就大面。」