韓國電影圈今年暫時只得一齣電影《逆權司機》累計觀影有逾1千萬人次，雖然今年仲有大半就完結，但由本周四起將有三大巨片輪流出籠，當中河正宇更有兩片上演，可謂自己打自己。

韓國電影今年有唔少佳作，好似《逆權司機》、《軍艦島》、《秘密任務》票房都好理想，而到年尾亦有三齣猛片推出，當中由鄭雨盛、郭度沅主演嘅《鋼鐵雨》就會喺本周四喺韓國上映，《鋼鐵雨》改編自網給漫畫《Steel Rain》，背景圍繞韓半島，係一齣間諜片，鄭雨盛飾演北韓前偵察總局嘅要員，而郭度沅則飾演南韓嘅外交官保安首席秘書，兩人之間所發生嘅故事。

至於第二齣上映就係由河正宇、車太鉉、朱智勛、金香起等主演嘅《與神同行》，電影將於下周三開畫，電影講述車太鉉飾演嘅消防員死後被帶到地獄，並要喺49日內喺7個唔同嘅地獄接受審判嘅故事，河正宇同朱智勛都飾演地獄使者，而李政宰將會以閻羅王一角特別演出。

最後壓軸登場就係同樣由河正宇主演，同片演員還有劉海鎮、金允錫、金泰璃等主演嘅新片《1987》，電影將於本月27號上映，《1987》故事以真實事件改編，講述全斗煥總統獨裁統治嘅時期，喺1987年全斗煥嘅7年總統任期將結束之際，全斗煥試圖繼續執政，但因為當時有一名大學生朴鍾哲喺警員嘅酷刑下致死，金允錫飾演一心想掩飾事件嘅警察局長，而河正宇就飾演大學生死亡時值班嘅檢察官，並執意要求驗屍才令真相曝光。

更多韓流，喺晒《娛果》
http://fb.com/appledailyent