今日猴年初一,八方祝全港市民身壯力健、有工開、有飯食,同埋立法會民主大會師。
民政事務局局長何志平,舊年去車公廟求咗支下籤,結果靈過鬼。八方有一個老友,係回流嘅加拿大公民,舊年一見到何志平求咗支咁嘅籤,信到十足,即時舉家再搬返加拿大。後來,香港沙士、禽流感,年尾重嚟多隻白無常蕭蔚雲,張開個血盆大口,咆哮訓斥,一見發財,可見肥何求得嘅呢支車公籤,幾咁有力,八方呢位加國老友,自幸走得快,去到嗰邊,隔岸觀火,心情大靚,重搞到個老婆大埋肚,第三個即將臨盆㖭。
肥何失職:唔肯再去求籤
喺溫哥華住到咁上下,對得啲海鷗海豹多,口淡淡,梗係又想回流返轉頭。八方呢位老友,想肥何年初二再去搵車公諮詢吓,好等自己決定今年返唔返。點知肥何今年偷懶,取消訪問車公廟,頓時冇咗神明指點,香港今年,如果有乜冬瓜豆腐,咁咪令人無法未雨綢繆?
因此,肥何今年年初二唔肯去車公廟,不但令八方喺加拿大嘅老友媽媽聲,搞到佢抉擇無從,肥何一年𢭃四百幾萬,人工嘅唯一價值,就喺年初二去車公廟嘅呢一鋪。你睇肥何求籤幾靈,今年若然再整多支下下籤,就即是話瘟疫重臨,由梁振英上台呀咁,啲人都叫做識得走避吓。唔去求籤,即係失職,肥何算唔算自私咗少少呢?
講到自私,阿董又出現嘞,發表所謂賀詞,話經濟出現V形反彈,得大陸CEPA所助,香港已經搵到新方向。
V形反彈?乜嘢反彈?無非係股市炒到新高,樓市見少少回升,同埋大陸自由行,人頭湧湧,飲食零售,生意叫做好番啲。