第二場四班1200米，除一匹初出馬「哈哈笑」之外，仲有九匹為處女馬身份，屬於四班弱組賽事，兩匹贏過的舊馬當然值得優先留意。「龜兔競跑」在三班贏過三場，級數全場最高，不過健康有過問題，近期表現大不如前，慶幸減分亦夠快，今季跑五場所負亦不遠，只是一再因慢閘致敗。牠的同母弟弟「奀皮仔」，跑同程14次有五成上名率，計血統谷草肯定啱跑。「龜兔競跑」月初由杜利萊試泥閘，起步稍慢但後追第五走勢不俗，明顯有番角逐興趣，今次突然改配鄭雨滇，此子搶閘功夫了得，部署對症下藥，排二檔預期際遇會好，只要出閘順利應該有得衝。
「回鄉更好」近三仗都在末段交出凌厲後勁，綁脷起到正面作用，提升馬匹競賽時的集中力，過往評49分在四班贏過同程，現時評46分不吃虧，改配輕磅殺手田泰安，乘銳勢再贏一場並不出奇。「心花怒放」跑同程三次都上名，均輸不足一馬位，跑谷草明顯好過田草，前速快過同場對手，排11檔亦夠快搶出埋欄，三甲機會仍樂觀。
「帶寶來」肌肉健碩，台型吸引，質素絕非四班可留得住，啱跑短途的Pins子嗣性能一如「飛哥」，今次轉倉初出有變數，又有降班之利，強配韋達顯爭勝決心，這匹不明物體絕對要防。