木村拓哉嘅15歲細女光希（Koki）以最強星二代姿態出道，由媽咪工藤靜香嘅公司捧做Model界超級新星，仲成為最新一期日本版雜誌《ELLE》封面人物。

Koki嘅Instagram粉絲人數已接近75萬，由於Koki身為木村囡囡，加上仲未亮節目及接其他工作，刺激佢嘅身價不斷上升，日本各大電視台都以超高酬勞力邀Koki上節目，有指現時Koki拍一次雜誌封面，叫價更達數十萬港元。不過，據日本傳媒指，Koki目前會以學業為重，只會接Model工作及創作音樂，暫時唔會全面投身藝能界，但正有超過10間廣告商想搵佢代言，當中更有大陸單位望斟木村囡囡合作，相信Koki身價會越叫越高。