ToNick成員主音趙善恆（恆仔）、結他手胡信希（小龜）、低音結他手陳誦賢（Ryan）、鼓手葉晨曦（晨曦）噚晚係九展開騷，呢個騷主要都係企位，特別安排咗一啲坐位俾有需要嘅人，ToNick等咗10年，終於可以上到舞台，佢哋嘅表現都好興奮，小龜親吻舞台，仲話：「我哋好辛苦來到呢個舞台。」恆仔仲同嘉賓Supper Moment主音Sunny一齊玩插水。

ToNick完騷之後接受訪問，成員晨曦話玩rap，下年出碟，要挑戰Mastamic，佢話：「唱完舒服哂，估唔到今年係Star Hall度開音樂會，以前最初係酒吧做騷開始，停留喺一千人場地做騷9年，曾經有諗過放棄，世事往往講緣份，遇到一首歌，冇諗過可以咁勁，多謝唱片公司4位老闆，不過嗰4位就係我哋自己，好感激屋企人，支持佢哋，俾佢哋闖，我哋夾band夾咗十年。」

晨曦仲話：「冇諗過做藝人咁有影響力，曾經有一次做騷，講咗一句，做人點為之無憾，聽日就死，你o依家都好開心可以笑得出，就無憾喇！點知網上有人留言話「我可以去死喇！」後來佢哋發覺講嘢原來會影響到人，所以以後講嘢會小心啲。

小龜錫咗個舞台一啖，佢話：「非常感動，最初夾band，冇咩人場地表演，o依家九展開騷，好唔捨得舞台，希望可以挑戰大舞台，之後有計劃，o依家作緊歌，希望場地可以有企位，去博覽度搞，不過都會有坐位， 因為有粉絲係大肚婆，仲有我哋真係好鍾意插水，嗰吓真係好靚。」

更多娛聞，喺晒《娛果》
http://fb.com/appledailyent