國際油價跌至18個月低位，短短兩個月由高位跌近五成，速度之快可媲美14年。常理推斷，機票的燃油附加費應有下調空間，點知上到國泰（293）的網站一看，長途機的附加費只由652蚊微降至584蚊，元旦生效。

民航處見國際間已逐步撤銷對燃油附加費的規管，終在今年9月宣佈可以復收，但必須在總票價時清楚列明機票價格、燃油附加費及稅項的分佈，而國泰亦立即帶頭徵收，這消息亦一度刺激當日股價急升7%。

提起燃油，大家都會記得國泰的神級對沖，令業績連續兩年見紅，11至14年油價長期高企100美元樓上，唔知邊位高手決定為未來四年的燃油作大手對沖，將燃油價鎖定在約90美元，對沖比率高達六成，跟住大戶似乎睇住佢來打，布蘭特期油從14年6月高位115美元，7個月內跌至45美元，一般航空公司梗係拍爛手掌啦，但「因航」對沖比率咁高，註定未來幾年係要挨貴油，年年因對沖而蝕幾十億。衰咗幾年，年初管理層已經講明，19年的對沖比率只會維持在兩成左右，盡量少做少錯。

上月底的分析員會議，國泰披露下年的對沖比率約三成，鎖定成本在60至70美元，對沖比率較年初所講的略高，或許因為今年8月起挾得太急，衝上85美元，臨急臨忙補返啲，因為那時個個都話油價睇一百架。最新的布蘭特油價是50美元，雖比成本價低兩成幾，但總算大有進步啦，況且仲有七成冇對沖，必然受惠油價怒插，唔好忘記佢仲有收燃油附加費，食盡兩家茶禮。

從成本面看，國泰已走出困局，但做生意幾時都要睇topline，股市跌到反艇，來年經濟肯定收縮，貨運及商務旅遊收入將受打擊，照咁睇國泰都算黑仔，經濟好時衰自己，重整旗鼓就遇逆境。

近年大家都話香港航空已超越國泰，但時移世易，你過到呢關再講啦。

Fb個人專頁 http://www.fb.com/chingbing888