拍廣告袋400萬 財多身子弱
馮仁昭四圍超:小齊狂屙17次腳仔軟

蘋果日報 2003/03/14 00:00


任賢齊早前去咗海南島幫康師傅冰紅茶拍攝第三輯廣告,聽講話自從小齊擔任呢個牌子嘅代言人之後,呢間公司嘅生意額升到嘭嘭聲,老闆開心到主動加佢酬勞至四百萬,重話今年會加多啲宣傳費㖭。小齊今次唔止荷包腫脹,重好有豔福,因為廣告嘅導演搵咗個二十一歲嘅丹麥、泰國混血兒SriritaJensenRita做女主角。

吊威吔踩板
呢位混血兒嘅身材係35、24、34再加一對長腿,佢個樣重有少少似港姐左慧琪,真係幾靚女。小齊今次拍呢個廣告要踩住滑板,不過有啲高難度動作就會吊威吔。小齊話今次最難忘嘅唔係靚女或者拍攝時要踩板,而係佢喺臨收工前一日,品嘗咗海南島嘅四川麻辣火鍋,食就好好味,但食完返到酒店,小齊就一晚屙足十七次,屙到腳仔軟晒。第二日除咗飲冰紅茶之外,乜都唔敢擺入口,好彩返咗香港睇醫生,醫生話佢冇細菌感染,都可以放心。

朱茵兩個鐘剃一次腳毛
朱茵日前接受商台訪問,原來朱茵最趣怪嘅習慣,就係佢最唔鍾意自己有腳毛,所以佢每隔兩個鐘就會剃一次腳毛,佢重話呢一個係興趣喎!真係唔講唔知,唔怪得朱茵拍纖體廣告嗰時,隻腳會反光啦!
嘟嘟得一個缺點
鄭裕玲(嘟嘟)日前接受商台梁芷珊訪問,梁芷珊打畀嘟嘟男友呂方講吓嘟嘟。佢哋拍拖十年,原來喺呂方心目中,嘟嘟只有一個缺點,佢話:「都係小毛病,就係個人性急,要人即時答覆,同埋唔可以遲到。」另外,嘟嘟噚日去咗中環買衫,見佢冇化妝,面上紅紅哋又甩皮,唔知係咪做咗換膚呢?問佢前男友甘國亮俾邵氏推出二十幾年前嘅舊作《蛇殺手》,套戲重有SM鏡頭?嘟嘟話:「唔講喇,咁耐以前嘅嘢,我哋甩咗拖咁耐,嗰啲唔好提啦!」

利嘉兒逆市加薪30%
利嘉兒噚日喺清水灣電視城為新一輯嘅《笑談普通話》開鏡拜神,佢話前排先同無綫續咗兩年約,條件重好滿意,加薪百分之三十,所以好開心。佢重話自己向來都好欣賞鄭裕玲(嘟嘟),佢話:「嘟嘟姐係我一個目標,因為一提到香港最top嘅主持人,係人都知係佢,我自己都好希望有機會同佢合作。」

阿姐冇霆鋒電話
汪明荃噚日去商台做訪問,梗係講吓佢下個月舉行嘅個唱啦。開咗咁多次演唱會、有無數演出經驗,而且信心十足嘅阿姐,今次居然話開個唱有壓力,佢話:「同期有幾個演唱會開,又左麟右李,霑叔又開。」另外,阿姐又講吓霆鋒復出,問阿姐有冇打電話畀霆鋒啦,點知佢話:「我冇佢電話。」做人契媽冇契仔個電話,都算奇。
empty
廁所喺邊度?
empty
有威吔踩板梗掂!
empty
朱茵
empty
鄭裕玲
empty
利嘉兒
empty
汪明荃