每個人都有喜惡，從平常舉動，基本已露到一二，人與人，人與馬都好，都會有這關係，騎師朝早操馬，與馬房騎馬人不一樣，冇指定操單一馬房，只要被關照，任何馬都可沾手，受歡迎如莫雷拉，隨時操到腳軟。

尚餘兩周便開鑼，外籍師傅陸續返港，霸定馬，有得騎而又鍾意的馬，經常都會親操，對此，我們要有觸覺，記住牠們的名字。

好似柏寶，回港後除愛駒「幸運如意」外，「快樂生活」是他上季至今經常在朝早主試的另一愛駒，還有新接手的呂廐馬「運財之星」也值得我們記住。

田泰安加入開工行列，第一朝又見他操賀賢馬房的「飛馬再威」，對此質新馬，可謂鍾愛有加，上季如是，今季又如是，一定有其道理。上季已察覺到田泰安，對此駒似乎情有獨鍾，可是予我印象一直都麻麻，首先馬仔細細，其次周身脾氣，再者亦唔覺係早熟短途馬，三方面結合都覺未有耐，所以一直抱住你有你操，點都唔會吼住的心意。

今季既然又見田泰安繼續咁落心機，會放長雙眼，睇吓田泰安有冇表錯情。新近睇番「飛馬再威」這匹嫩水馬，上季跑三場表現其實比想像中好，今季只要進度符合預期，可能未必要等到季中，不過目前言之尚早，仍待繼續觀察。

相反柏寶由上季鍾意到今季的「快樂生活」，相信會較快有回報，一來始終是已跑過的自購馬，且在上季已證明確有不俗能力，柏寶應冇愛錯，大致已嘜定是季初的目標馬。