立法會3.11補選大戰前夕,民主派首要搞好喺14日舉行嘅九西同新東初選,選出戰將喺兩區代為披甲。九龍西選情方面,被DQ嘅立法會前測量界功能組別議員姚松炎呼聲較高,暫時人氣同支持度都力壓民主黨袁海文同民協馮檢基,但姚教授未覺穩操勝券,絕對冇hea做,仲要初選當直選咁做,呢個星期起朝早同夜晚都開街站,仲要成立「山旮旯投票團」,親自帶領支持者初選日去投票,力爭九西出線權。
點解投票團命名「山旮旯」?似乎都係要凸顯無論票站喺天涯海角,佢哋都會去投票嘅決心。查實負責協調泛民初選嘅民主動力,據知會喺下周日公佈初選日票站嘅實際地點,聽聞九西會有3個,都係要靠宗教團體等組織借場。