或者有球迷會問，白蘭斯咁老，點解曼聯重肯同佢續約嘅？原因好簡單，就係曼聯領隊費格遜喺度鬥氣，同埋佢哋後防冇晒人囉。
費格遜上屆簽咗白蘭斯後，俾人鬧到飛起，話佢簽錯人，結果曼聯真係食白果。係人都知老費份人心高氣傲，佢點都要證明自己冇做錯，所以咪同年尾都成三十七歲嘅白蘭斯，簽多一年囉。
另外，曼聯放走咗艾雲、朗尼莊臣同禾獲克，加上加利尼維利又未傷好同埋未簽到啲有實力嘅後衞，所以喺迫於無奈之下，都要留用白蘭斯。
之但係，我求大俠就唔睇好白蘭斯可以打足全季，事關以老費性格，曼聯今季肯定會買不少於一位頂級後防猛將返嚟，只要佢哋嗰後防新班子踢順咗，白蘭斯睇怕要同蘇斯查一樣做「超級後備」囉。

阿仙奴拜仁季初濕滯
阿仙奴同拜仁慕尼黑喺嚟緊季初真係會幾濕滯。事關前者嘅瑞典中場龍格保喺世界盃整親臀部，起碼要休息三個月；加埋皮利斯未好番，兵工廠季初真係雙翼齊跛。拜仁嘅情況更慘，高價新簽返嚟嘅戴斯拿喺世界盃熱身賽重創要唞五個月，唔怪得話要告德國足總索償啦。

李瑋峰安琦傳出外搵食
國內有報道話李瑋峰會去德國踢利華古遜，而安琦就會去英超落班，但係我求大俠就唔係太相信，因經過世界盃後，證明班國足未夠火喉，所以想出國搵食，機會唔係咁大囉。