今年34歲嘅楊明，曾經同已經做咗人妻嘅陳敏之拍拖，又喺大前年宣布同拍拖3年嘅圈外女友Joanna結婚，但最後離奇分手收場。

由於楊明經常媾女，05年又曾因醉駕及刑毀惹上官非。及後楊明表示有悔意會檢點，不想令人覺得佢只係「蒲精」爛玩，更謂:「但我識朋友都知我係鬼仔性格，依家好似搞到本人已經變成一支酒。」惜出事後無綫即改變初衷，未再予以力捧，其事業至今亦未再有起色。

噚晚本報收到讀者報料，話楊明同一位長髮女喺紅磡一間酒吧出現，仲話二人有拉扯動作，而同行仲有一位無綫男藝員。本報凌晨12點幾去到現場，果然發現楊明同無綫藝員趙永洪喺酒吧飲酒，同行就係一位着白色低胸背心嘅長髮女。

現場所見，三個人喺酒吧交談唔太多，大部份時間都係各自低頭玩手機，但楊明同長髮女就一度喺酒吧入面明目張膽吸煙，酒吧侍應雖然見到，但完全冇阻撓。

三個人最後飲到凌晨2點幾離開，楊明行出酒吧即小心四圍望，之後長髮女由酒吧行出嚟，明顯腳步浮浮，唔單止左搖又擺，仲用手按住心口，作勢想嘔，其間又有意無意咁喺楊明面前盪來盪去，似乎想引楊明注意，可惜楊明冇乜反應。

楊明見到趙永洪喺酒吧出嚟，就拿拿聲行去攞車，長髮女仲畀趙永洪一馬當先搶咗個車頭位乘客位坐，佢只好自己開門坐後座，而睇嚟最清醒嘅楊明，就負責揸車載兩人離開。