立法會議員有幾巴閉呀，吸引到「狗仔隊」𥄫實？議員嘅吸引力當然唔及明星同藝人，但佢哋手上嗰票對政府卻好重要，所以每逢立法會要表決重大法案或進行爭議辯論，相關政策局都會派出大量俗稱「狗仔隊」嘅政務官（AO），守住立法會每一角落，確保投票時唔會因為唔夠票而甩轆，但狗仔隊形同監視嘅舉動卻惹議員不滿，要求當局檢討有冇需要人盯人。

政府查實唔只喺立法會出入口駐「重兵」，就連飯堂、休息室甚至廁所都會有狗仔隊駐守，吼住邊啲議員走出走入，如果議員離開立法會大樓，狗仔隊有時都要厚住面皮問佢去邊，確保議案表決時，建制派趕及入場保駕護航。

政務官抗拒：嘥時間

街工梁耀忠就唔多習慣被𥄫，佢噚日喺立法會提出口頭質詢，要求政府檢討呢個政策，大嘆行步路都被check實晒，唔多自在，仲引述政務官朋友話，佢哋非常抗拒去立法會做狗仔隊，覺得一日到黑只負責數人頭，無所事事好嘥時間。工黨李卓人仲話呀，狗仔隊其實只想監視建制派啫，泛民無辜遭殃，真係浪費人才同公帑。
負責答辯嘅公務員事務局局長鄧國威，自爆廿幾年前都做過相似工作，但唔會用「狗仔隊」嚟形容，強調留守立法會嘅政務官，都係游說議員同了解投票情況，然後向上級匯報並支援局長，角色好重要，係政務官受訓嘅一部份。
今年6月立法會內會辯論用特權法查張震遠商交所事件，成班狗仔到場𥄫實建制派，成功箍票否決徹查動議；但舊年6月底就滑鐵盧，表決5司14局重組政府架構建議時，雖然大量狗仔隊喺立法會人盯人，但議案最終以一票之差被否決，時任政務司司長嘅林瑞麟仲嚇到O嘴㖭。

mailto:[email protected]

足本收睇《亂噏24》x 陳慧琳；之後有請搞笑孖寶鄭中基谷德昭玩轉再玩轉！
周一至周五《亂噏24》約定你： http://bit.ly/appletalk24