富二代唔跟老竇條路，另覓出路，可以殺出新血路，更可以自掘墳墓。舖王鄧成波之子鄧耀昇（Stan）在旅遊業走下坡，走去開10間酒店共1,800間房，規模相當於6間九龍半島酒店，有錢就是任性嗎？訪問劈頭就問呢點，80後的他淡定咁話：「我哋唔係睇咁短視，如果搞酒店集團，睇兩、三年唔掂就頂俾人，太兒戲!」

早年政府活化工廈政策，吸引舖王波叔由舖市短暫轉戰工廈，幾年前買入多幢工廈改裝，可改做酒店、寫字樓或零售，2年前見到旅遊業風光，負責管理資產的孻仔Stan決定改做酒店叫做幫物業升級，原本計劃翻新後出租，但反應差，心諗「人地做，不如自己做」，結果踩隻腳落去，選擇做酒店，當時他忽發奇想：「香港房屋短缺，酒店可唔可以加快提供住宅俾市民呢？當然酒店同住宅係兩樣嘢，但係咪可以短期出租呢。就算酒店出租率唔係租爆，我哋都可以租俾市民……兩手準備，旅客得，本地客又得。」

他旗下10間酒店在目前至2018年推出市場，級數由2至4星，合共1,800間房間，當中1,300間房間透過工廈活化得來，今年主要3間酒店位於葵涌，合共900間房，其中一間位於葵涌酒店房價每晚平均約500元，其餘酒店分佈屯門、灣仔、油麻地等地區。以九龍半島酒店有300間房，換言之相當於6間半島酒店的規模。

然而好景不常，2年前的決定，今日卻碰上旅遊業轉差，拖累酒店業，Stan處之泰然咁話，當初改建成本低，原本行高檔次每呎裝修費逾3,000元，當時計一幢30萬方呎酒店豈不是要9億元，「夠買多兩幢工廈啦!」，結果走中檔次，慳到每呎裝修費約1,000元，一幢30萬方呎酒店翻新費大約4億元。

雖然是酒店業初哥，但心態一啲都唔似，他指，內地客跌勢確實持續，而且留港日數少，甚至即日來回，不過其他旅客有回升跡象，好似日本及南韓，分別按年升2.2%及11.9%，「唔係食正低潮低谷，房客量慢慢上緊來，非內地客，好似台灣、日本、韓國客都陸續上緊來。當初成本低，遊客又返緊來，而家係食返上緊個浪。」

他認為現在正是大展拳腳的時機，「我一路加人，其他集團一路減人……跌得最傷是5、6星酒店，自己行2至4星酒店路線，呢個筆直吸引到啲客，希係係呢浪，乘住咁上……之前房價太癲，好似尖沙嘴重慶大廈，一個床位，日租過千蚊，太離譜!」

「我地唔係睇咁短視，如果搞酒店集團，睇兩、三年唔掂就頂俾人，太兒戲！嚟緊香港有好多大型活動，回歸20周年、港珠澳大橋、機場第三跑道、樂園擴充，近期又話有個故宮博物館，香港唔係地產金融，就係旅遊、零售，政府會花好多心機係呢度。」

唱好前景，但不諱言：「要諗多啲翹，填滿酒店!」家陣同日本、韓國當地嘅旅遊發展局合作，安排旅客來港深度遊，「舊時遊客來睇景點、購物、食好野，但而家來香港會捐窿捐隙，好似西貢都多咗人行山，唔係純消費，而是想了解你呢個城市。」做酒店唔單是租房，「如果一個遊客來，只提供房間，只佔旅程少部份，來到離唔開食飯、行街、娛樂，你幫佢諗埋，更加大原因去揀你間酒店。」

除了旅客，再搞本地市場，初步構思學術交流團、本地商務團，「唔係旅遊性質個啲，有啲公司管理層好鍾意行開幾日，去做retreat，與世隔絕一陣，我地提供酒店房間、活動場地，令佢地呢幾日去做個人及業務計劃；又整啲卡通火車、公主等主題房，俾香港人一家大細，唔使飛去第二個國家，係香港都可以玩下，提供特色菜單。唔使依賴旅客，香港人唔介意留港消費。」

呢一切都唔係亂嗡廿四，暫時開咗2間酒店，平均出租率逾9成，其中一間11月出租率達到100%，當中以日韓旅客為主。家陣目標今年酒店平均出租率82%至85%，望第二年收支平衡，賺到錢會擴充，事關仲有4個項目可以改建為酒店，市況好轉，一於改埋，勢行開拓酒店王國。

記者：陳家雄

掌握財經生活資訊，即Like「蘋果ATM」fb專頁啦！
http://fb.com/appledailyatm