楊秀惠早排喺佛山，為大台重頭劇《大帥哥》拍外景時，幾乎中暑暈倒(新聞連結： http://bit.ly/2wx02Zg )。

估唔到今日輪到同劇拍檔曹永廉(阿廉)出事，佢今日喺微博貼咗張瞓喺醫院嘅相，相中見到阿廉隻手接受俗稱「種豆」嘅靜脈注射治療。佢留言話：「剛做完一個小手術，一切正常，休息兩天繼續工作。」唔少好友包括陳法蓉同黃翠如，都紛紛留言問候阿廉。

當中最搞笑嘅就要數黃智賢喇，佢留言問阿廉：「甚麼手術呀？隆胸？抽脂？增高？定變性呀？非常擔心你！保重身體呀！」

對於入院做手術，阿廉今日回覆傳媒話：「其實隻腳有啲勞損，腳趾啲筋位生咗啲啫喱瘤，放心，係良性嘅，不過有幾粒凸咗出嚟，開始有啲痛，所以就趁有兩日時間入院割咗去，之後都要忙住開工。」阿廉自從舊年喺台慶攞咗「最佳男配角」後，工作接住嚟，拍完《超時空男臣》跟住就接《大帥哥》，早排就留喺佛山，喺酷熱天氣下拍外景，忙到氣咳，今次入院做手術，順便唞兩日，叉足電先再搏殺都好應該。