當年今日
關於我們

李八方online︱民建聯敗將聲稱被拒派口罩 均益二期管委會秘書轟屈得就屈

蘋果日報 2020/12/20 16:34

李八方online民建聯

民主派中西區議員黃永志去年成功光復包括中聯辦在內嘅西營盤選區後,落選嘅民建聯社區主任劉天正即刻小動作多多。繼早前老屈「暴徒」整爛佢嗰塊其實被風吹爛嘅易拉架後,今日又再老屈近日有武肺確診個案嘅均益大廈二期業主立案法團管理委員會(管委會)「可恥」,話個管委會「因為政治問題」拒絕民建聯將口罩送到住戶信箱。
均益二期管委會秘書高先生同八方講,劉天正從無向管委會申請派口罩,認為劉天正「屈得就屈」。
高先生話,民建聯財政資源咁豐富,其實可以改用郵寄方式直接送口罩畀居民。雖然佢覺得劉天正抹黑法團做法可恥,但佢都選擇「與其噴口水,不如噴消毒藥水」,噚晚凌晨已喺該大廈一名熱心住戶免費借出器材下,漏夜喺大廈公眾地方進行消毒工作,嚟緊仲諗住同區內區議員合作,幫埋附近有確診個案嘅大廈做埋免費消毒。
當區區議員黃永志就同八方講,過去一直都有關心均益二期嘅疫情問題,除咗有派口罩同潔手液畀街坊,亦有叫食環署加強清洗附近街道,並開街站呼籲街坊呢期要減少雀局同飯局。
黃永志又話,均益二期周五再出現確診個案後,佢已要求衞生署派專家檢視大廈喉管及通風結構是否存在風險。
empty
黃永志噚晚已經送咗啲口罩比均益二期D座街坊。黃永志Facebook圖片
-----------------------------
《蘋果》英文版免費試睇:了解更多
英文版已登錄《蘋果》App,立即下載/ 更新iOS / Android
-----------------------------
支持蘋果深度報道,深入社區,踢爆權貴,即Like蘋果專題及調查組FB專頁