噚日香港有5套新戲上映，不過當中最矚目嘅當然就係吳京自導自演嘅主旋律電影《戰狼2》啦，因為呢套戲喺大陸已經上映一個月有多，已經超過56億元人民幣票房（約67.3億港元）。

不過《戰狼2》嚟到香港就冇咗股氣勢，首日票房榜只係以34.8萬元排第4位，但有院商要求加場，噚日《戰狼2》只係排咗84場，嚟緊聽日星期六仲會加到138場，升幅超過6成。

最明顯係由全國政協委員林建岳旗下MCL（洲立影藝）嘅Star Cinema，由噚日只係上1場，到聽日加到至少有5場。據知，呢次加場行動係院商主動要求加映，而唔係發行商爭取，睇嚟岳少都想大家睇好戲呀。

再睇埋觀眾今日反應，朗豪坊Cinema City下午4點40分同AMC Pacific Place下午5點35分嘅場次，幾近全院滿座，淨係得番頭兩行有吉位，聽日朗豪坊仲有一場full house……身在北京嘅吳京知道加場當然高興 ：「票房成績不在我掌握之內，觀眾入場我已經很高興，感謝他們入場的一票。」而截至今日下午5點，《戰狼2》嘅即時單日票房約為21萬元。

另外，講返首日票房榜，排名第一嘅《小丑回魂》(IT)以67.8萬成為開畫冠軍，第二位喺湯告魯斯（Tom Cruise）主演嘅《巴利薛爾: 飛常任務》(American Made)，以60.2萬成為開畫第二位。呢個第二真係得來不易，因為只係險勝第三位港片《西謊極落: 太爆.太子.太空艙》嘅首日票房130幾元。

相關文章：
【截至下午7點即時票房】《戰狼2》終於香港上畫 暫收23.7萬
http://bit.ly/2vL1Vx0

【香港人爭住睇！】主旋律電影《戰狼2》早上場次「包場式」見紅
http://bit.ly/2gNOiun