【狗仔出更】新戀情曝光？ 劉美君孖四眼熟男撐枱腳

蘋果日報 2017/12/30 00:00

劉美君Prudence狗仔出更
    剛踏入53歲嘅「至索嫲嫲」劉美君（Prudence），今年10月同混血男友Steve嘅8年情斬纜，回復單身嘅Prudence風韻猶存，日前着到鬼火咁性感，現身上環孖四眼熟男撐枱腳，全晚騷胸半露電力四射，疑似新戀情曝光。
    當晚6點45分，《蘋果》記者喺上環一間西餐廳，發現着超deep V低胸兼化行妝嘅Prudence，對面坐咗一位外表鬼鬼哋嘅四眼熟男，兩人等嘢食其間傾得好投契，扮到鬼火咁靚嘅Prudence風情萬種，不時挨實枱邊雙手托下巴，有意無意間騷身材誘男友人，當食物陸續上枱後，Prudence習慣相機食先，四眼熟男不斷搵話題傾偈，搞到Prudence不時笑晒，仲一碗嘢兩份食，氣氛愉快。
    其間可能餐廳冷氣太勁，着到好性感嘅Prudence覺得凍，前後三次又着褸又除褸，當食飽飽之後，見到Prudence出手搣四眼熟男下巴，又似是體貼地幫對方拭幹淨嘴角，約8點15分由男友人埋單，Prudence撬住對方手臂離開餐廳後，兩人行過對面賣日本燒酒店舖，滴酒不沾嘅Prudence，專誠齋坐陪四男熟男嘆番杯，離去男友人變身護花使者，先將座駕駛近路邊，兩人又拖手又蹺手又攬腰，護送Prudence上車送返半山香閨，然後才獨自離去。
    記者致電問Prudence係咪有新男友？佢表示：「唏！因為啱啱我生日，好多日都有慶祝，呢個唔係新男友，我哋識咗幾十年，唔係十幾年廿幾年，係30幾40年嗰啲，真係由細識到大，你話見到佢好照顧我，咁死黨咁老友識咗咁多年人，就算唔係佢，一般嘅gentleman都好照顧，咁我又着緊高踭鞋，嗰陣又斜路，扶住我上車好正常啫，任何一個gentleman都會做嘅嘢，唔係追唔追，幾廿年追乜鬼嘢，如果我有男朋友，我第一時間會話畀大家知，放心。」
    【minigame】2017瘋暈人物 返工打機唔使擇日
    http://bit.ly/2CeWQkP
    更多娛聞，喺晒《娛果》
    http://fb.com/appledailyent
    empty
    採訪、攝影：畢紹基、孔志豪
    empty
    剛踏入53歲嘅「至索嫲嫲」劉美君，日前着到鬼火咁性感，現身上環孖四眼熟男撐枱腳。
    empty
    當食飽飽之後，見到Prudence出手搣四眼熟男下巴，又似是體貼地幫對方拭幹淨嘴角。
    empty
    empty
    劉美君全晚騷胸半露電力四射，疑似新戀情曝光。
    empty
    empty
    Prudence撬住對方手臂離開餐廳後，兩人行過對面賣日本燒酒店舖。
    empty
    滴酒不沾嘅Prudence，專誠齋坐陪四男熟男嘆番杯。
    empty
    empty
    離去男友人變身護花使者，先將座駕駛近路邊，兩人又拖手又蹺手又攬腰。