康樂及文化事務署嗰位高大威猛嘅署長周達明，一上場就自動引爆上手王倩儀嘅炸彈──康文署外洩咗市民個人資料單嘢，官場中人話佢真叻仔。不過，最近周署長終於衰番鋪，令官場中人不禁偷笑。話說康文署每星期要輪流關閉泳池大清洗，但端午節嗰日好多人要游龍舟水，當局都照閂，搞到啲街坊好㷫。原來，周署長喺內部審閱下屬準備好公告端午節洗泳池嘅新聞稿時，都留意到端午節係假期，於是問個助理署長，答案係兩年嚟都係咁啦，仲話諮詢過區議會，於是照批，結果俾人媽到飛起。