台灣女子組合S.H.E成員Selina自從2年半前喺大陸拍劇嚴重燒傷後，一直都著住壓力衣復健，康復期間出席活動都要著住壓力衣。

噚日佢出席台灣一個公益活動時，未有著上壓力衣，手臂上面畀火噬嘅傷痕清晰可見 。Selina回憶受傷時身邊親友畀佢嘅鼓勵，忍唔住當場落淚。

Selina自言呢一兩年曾經係一個冇生活能力嘅人，亦都唔知自己存在嘅意義。直至佢勇敢戰勝痛楚，回復工作，Selina自豪咁話:「 我是一個可以給人家力量的人 。」

不過Selina坦言到目前仲未可以平靜咁面對受傷嘅事實， 諗起當時受傷情緒仲係會崩潰，希望有一日可以淡忘 。對於身上嘅疤痕，佢就話見咗兩年已經好慣， 依家唔會刻意遮掩 ，亦請大家唔好將目光一直停留喺疤痕上面。

Selina，加油呀﹗