與羅力威結束七年之癢，雨僑今年3月31日正式踏入人生另一階段榮升為羅太。一向工作至上的雨僑，直認婚後感覺輕鬆多了，並非有了老公養，而是精神上有老公作為依靠，那一份幸福感覺正如當你找到對的事及遇到開心事一樣。

婚後半年，見到雨僑與老公羅力威一抽到時間，便啓動無休止蜜月之旅，早前到大阪時遇上颱風「飛燕」，幾經轉折有驚無險順利返港。日前雨僑於尖沙嘴接受專訪，暢談婚後轉變及工作生活。婚前雨僑甚少談及生活的事，一來她覺得自己鏡頭以外生活沒有趣味，未必有人想知，而婚後她變得放膽去講生活，事關新生活令她有更多得著同體會，問到最大改變是甚麼？她甜笑地說：「輕鬆咗好多，唔係因為覺得結婚後有人養，而係精神上有依靠，我以前將工作放到好大，但o依家啲人睇幸福同成功，唔好似以前一定要嫁有錢人或者拎好多獎，啲人覺得搵到啱嘅，搵到最開心嘅嘢就替你開心，我嘅情況就係咁，有老公依靠，有乜事都有人承擔，好似今次去旅行咁。」

夫婦兩人結婚前接受了婚前輔導，雨僑指老公婚後依然如一，但在生活中發現更多，在接受輔導時，她發現原來老公在處事嚴謹度上比自己更高，所以婚禮事宜都全權交由老公負責，她一萬個放心完全無插手。雨僑指兩人日常分工非常合拍，她說：「我哋分工好完美，我鍾意煮飯，佢鍾意清潔，我就負責執嘢。」兩人性格處事及價值觀也相近，她說：「好似我哋結婚無搵Wedding Planner，因為我哋鍾意自然啲，加上我有KOL工作，所以我哋好遲先公佈婚禮，因為覺得有個尷尬位，如果有工作接唔接好，但有贊助又無理由唔要，若果咁件事就會失真同失去style，其實場地同回禮禮物都係我哋自己畀錢，係裝身著上身先有贊助，但都唔係賣廣告嘢。」

成為羅太，順利成章避不開被問何時做羅媽媽的問題，雨僑覺得最緊要件事合理，可能好多人覺得生小朋友前要有樓有車，當然這些也是重要，但更重要還有其他，她說：「更加決定可否生小朋友係你有無做榜樣，例如有啲情況，返到屋企講親戚啲事，有時未必可以喺小朋友面前講，有時好攰返到屋企就踢走對高踭鞋，呢啲又唔做得。」所以她覺得身教是想生小朋友前首要條件，當然她覺得跟老公也並非完美的人，也需要學習更好品格，但經已隨時準備好成為父母心態。

幕前身份是藝人，在網絡世界上，雨僑是一位KOL，她坦言這個身份佔去了她生活中95%時間及成為收入主要來源，她說：「我其實都唔覺得自己叫KOL，最多係叫Blogger，我都算係最早期嘅Blogger，其實我哋80後，當年好多時喺網上寫日記，之後再細啲一輩就玩facebook同instagram，所以當之後要喺網上寫嘢放相，我都唔覺得係好困難。」初時以Blogger身份現身，雨僑坦言不敢跟人講相關工作，因為沒有人明白是甚麼，直至十年後今天才敢去分享這份工作。

跟客戶接觸及傾談一宗合作生意，雨僑形容像返文職工作一樣，要寫好計劃書到客戶公司講解怎樣做，之後又要影相拍片剪輯，初起步時完全一腳踢，沒有人明亦沒有人幫手，如今市場成熟，同時獲得更多配套支援。在這行已經有知名度，問到雨僑是否工作多到應接不暇要取捨？她笑說：「又唔好咁講，我做咗十年，我覺得係要啱自己先好接，咁先有感覺去做，正如我鍾意咖啡，若果係咖啡機我會仆倒去做，若果係茶，我就要多啲了解，好似狗糧我就唔識，貓糧就熟可以做。」她覺得最好KOL一職，有兩件事好重要，首先是清楚自己適合甚麼產品，第二樣是要有正職支持，一來能夠從正職中增加人生閱力，像她的幕前工作令她能發掘更多事物在網上分享，二來有了其他少少收入維持生活，便不會令自己迷失去亂接產品來做，最後她表示KOL比做幕前更辛苦，除了跟演員一樣要保持最佳狀態外，你更加需要去了解產品特性，並加以整合資料、相片配合推出。

Hair：Adam Hui@ W Salon By II Colpo
Makeup：Lisa C.@ Lisa C. Makeup Art
Outfit：Spark Fashion
Location：Prince Hotel