唔明點解呢排成日都傳有股份批股，好似上次瑩輝（1163）出業績，就傳過公司會批股集資，但結果公司就即刻急急腳否認。今次經紀黃又話，勝獅貨櫃（716）將於下周出業績後，都話有機會批股。
勝獅早幾個月曾經進行過一些收購，之後股份就開始有多少成交，而股價更一度升上70仙，噚日就收65仙。
經紀黃話，勝獅隻古仔，同瑩輝之前傳過隻古仔都甚為相似，都係話業績出嚟會OK，然後公司就會做路演或者公司探訪，如果反應唔錯的話，就會順手批股集資，以應付之前進行的收購計劃。
咁小初又唔明，點解上次瑩輝又無成事呢？經紀黃話係時辰未到之故喎。
另外，早排出現斬倉疑雲嘅惠揚控股（231），噚日又被人質低，一度跌至4.9仙，收5.2仙。經紀陳話係上次班炒家食過翻尋味，想再引發斬倉盤，低位收一浸再炒過。