當年今日

馮仁昭四圍超:
塔倫天奴狂𠝹蘇菲亞突取消訪港

蘋果日報 2004/04/29 00:00


荷李活鬼才導演昆頓塔倫天奴(QuentinTarantino)拍完《標殺令》後,曾經同女主角奧瑪花曼(UmaThurman)傳緋聞,不過上個禮拜佢多次被目睹喺紐約同已跟導演史碧鍾斯(SpikeJonze)分居嘅《迷失東京》女導演蘇菲亞哥普拉(SofiaCoppola)約會,佢哋除咗上周五一齊喺紐約市出現外,周六又到酒吧消遣,星期日重手拖手去影視店租DVD,非常親密!

Rosemary捧塔倫天奴
趁住《標殺令2》今日喺本地上映,塔倫天奴本來決定下星期嚟香港,星期四(六日)同本地傳媒見面,之後就會轉去法國,為康城電影節擔任評審團主席。點知塔倫天奴噚日突然透過Miramax電影公司宣布因為唔舒服,取消下周來港行程,搞到已經幫佢book晒酒店嘅電影公司十分頭痛,簡直鬧劇一場!
另外劉家良、劉家輝同劉家榮三人,以及江欣燕夫婦及Rosemary等,前晚去尖沙嘴睇《標殺令2》首映,早排江欣燕丈夫俾人影到扶住女伴嘅照片,前晚兩夫婦着情侶裝闢謠,江欣燕話:「我唔識個女仔,我亦有同男性朋友去夜街,嗰日我老公行條斜路,扶吓人好正常啫。」

廖碧兒纖體唔使着泳衣
廖碧兒前晚喺柴灣幫纖體產品諾纖拍廣告,取代咗陳慧珊(Flora)做代言人,不過廖碧兒話:「唔係,Flora啱啱同呢個產品嘅合約滿咗。」問廖碧兒點解唔着泳衣上陣,佢話:「以健康形象為主,如果有需要咪着。」廖碧兒已落實做許冠傑演唱會嘅嘉賓,佢到時重會唱歌同跳舞,廖碧兒話:「阿Sam之前重送咗個簽名結他畀我。」真係恨死隔籬。
張佩金祈求早日返港
張佩金早排喺上海遇車禍受重傷,𠵱家重喺當地養傷,有線娛樂新聞台上個星期就派咗攝製隊去上海採訪。張佩金好想返香港繼續工作,不過醫生覺得佢嘅要求係「發神經」。佢想試吓唱歌,但唔夠氣,唱兩句就會好攰,希望佢快啲好番啦。另外,有線亦訪問咗張佩金嘅男友洪子軒(Harry)。

曾志偉搵林苑唱歌有因
曾志偉同林苑及《江湖》嘅導演,噚日一齊去港台做訪問,本來有信心電影總票房可以過億嘅志偉,話套戲冇得喺內地上映,應該好難達到呢個數字,至於套戲嘅主題曲,就由林苑同杜汶澤唱。曾經同林苑傳緋聞嘅志偉,理直氣壯話唔搵劉德華張學友啲天王合唱,就俾人話有私心,佢話:「愈描愈黑,冇需要理,而且華仔當時(因合約問題)唔唱得歌嘛!」

林曉培谷新歌唔衰得
林曉培(Shino)第一次喺上海發表新歌《無私的天堂》,亦係佢首次同上海管弦樂團合作,Shino好興奮咁話:「和管弦樂團合作是絕不可以有任何差錯,感覺很不一樣。」Shino早排特登嚟香港幫張佩金錄歌,𠵱家歌名定為《h》,Shino話:「我很重視這首歌,不管要到錄音室多少次,我都要錄得最好,希望五月初能完成製作。」

邵逸夫誤傳內地入院
噚日坊間突然傳出無綫電視老闆邵逸夫入咗醫院,馮仁昭就打畀無綫總經理陳志雲,佢話:「六叔同太太方逸華去咗杭州一間佢資助興建嘅醫院度參觀,今日有咁多記者誤傳六叔入醫院,真係莫名其妙,六叔不知幾精神,佢同太太周一先會喺內地返香港。」知道六叔冇事,啲記者先至鬆一口氣!
empty
廖碧兒
empty
張佩金(左)
empty
邵逸夫。資料圖片
empty
林苑、曾志偉
empty
林曉培