當年今日

熾熱消費:
至In洗衣機 頂蓋玩半透明

蘋果日報 2002/08/13 00:00


以前洗衣機、雪櫃呢類家電,外形都係白雪雪,講得好聽就係樸實,難聽啲就係睇到發悶!幸好日本近年興喺家電上玩顏色,連洗衣機都加塊靚靚嘅半透明機頂蓋。今年呢類玩透明Feel嘅水葉式洗衣機喺香港大行其道,唔單止日本機,就連韓國牌子都有推出,認真唔講得笑!除咗樣靚外,功能當然不可忽視,當中以日立最新標榜特快洗衣功能的機款最為矚目。

記者:張穎倫 
攝影:陳穎 
ImageGirl:Suki
日立0.8公斤衣物洗得最快
呢部機嘅機頂蓋,透明部份唔算大,而且選用較保守的茶色,外觀上唔算有太大驚喜。佢標榜洗0.8公斤或以下的衣物,只需11分鐘搞掂,雖然唔係咁實際,不過就夠晒突破!此機新設的特快洗衣功能,以強力水流由上而下、以中心循環四射,迅速洗透衣物每一角落,現時市面其他牌子的洗衣機,同樣洗0.8公斤衣物的話,最快都要20分鐘,足足快咗9分鐘㗎!

型號:日立SF-S600X
洗衣量:5公斤
乾衣速度:750轉
體積:W500×H960×D513mm
售價:約$2,680(各大電器行)
洗衫板搓揉效果
可能你會擔心,11分鐘咁快,啲衫會唔會洗得唔乾淨?呢部機特設藍色洗衣蓋,將衣物壓喺水面下洗滌,形成洗衫板嘅搓揉效果,加埋強力水流,雙管齊下就夠晒乾淨啦!
富思電腦控制更方便
由電腦自動感應衣物重量、質料,調節水位、水流,一按特快、浸洗等按鈕就即時開動,極之易用。值得一提係旋洗功能,可以做到仿乾洗效果,就算絲絨、羽絨都一樣洗得,連乾洗錢都慳埋。
聲寶機身靚仔功能多
單睇半透明嘅綠色機頂蓋襯上米色機身,已相當吸引,講到內涵則更厲害,除咗快思邏輯、完成洗衣響鬧呢啲基本功能外,更採用雙旋轉葉輪,可以分別產生垂直同水平嘅水流,既可增強清洗效能,又可減少扭動帶嚟嘅衣物損害。再加埋原創嘅無孔洗衣槽,能避免乾衣時對衣物嘅擠壓,對衣物呵護備至。

型號:聲寶ES-F650
洗衣量:4.5公斤
乾衣速度:900轉
體積:W565×H905×D541mm
售價:約$2,180(各大電器行)

型號:聲寶ES-S750
洗衣量:5公斤
乾衣速度:900轉
體積:W565×H905×D541mm
售價:約$2,280(各大電器行)
嫌ES-F650的洗衣量唔夠多的話,聲寶還推出了大容量嘅半透明紫色機頂蓋機款,鍾情紫色的朋友不妨諗諗!

無孔洗衣槽運作
傳統有孔洗衣槽,令衣物喺乾衣操作時被擠壓至槽孔,造成損害。但無孔洗衣槽設計就可以省卻擠壓問題,令衣物保持最佳狀態!
三星金光閃閃夠貴氣
如果你嫌白色,以至Colourful嘅顏色都唔夠貴氣的話,呢部韓國機採用金光閃閃嘅黃金色機殼,就絕對氣派十足,極之搶眼。咪睇小韓國產品,呢部機嘅機頂蓋以透明設計,抵讚嘅係快思邏輯電腦能利用瀑布式同旋渦式嘅水流,令洗衣更乾淨之餘,亦可保護衣物質料。

型號:三星WA85K2SP
洗衣量:6.5公斤
乾衣速度:無註明轉速
體積:W540×H850×D560mm
售價:$2,180(華仁會)

洗衣槽一樣閃
唔單止金色機身夠晒閃,連機內洗衣槽亦都閃到爆燈。質料採用不銹鋼製造,夠晒耐用,比起部份日本牌子仍採用塑膠洗衣槽更加高級。
金章油壓桶門一指OK
如果你用開歐洲機,有冇試過開洗衣機桶門時,畀佢「拍」一聲彈開嚇親。為咗解決呢個問題,呢部歐洲上置滾桶式新款洗衣機,就首創輕柔式油壓桶門設計,只需一指輕按,桶門就會慢慢打開,又靜又安全。佢更獨有桶門還原裝置,洗完衫後,毋須用手翻動滾桶,夠晒方便。

型號:T633
洗衣量:5公斤
乾衣速度:650轉
體積:W400×H850×D600mm
售價:約$3,898(各大電器行)
油壓式避震減噪音
金章專利發明嘅碳纖維洗衣機底盤及外桶,出咗名夠晒耐用兼隔音好,𠵱家加埋油壓式避震嘅設計,能將機身震動以及噪音減到最低,絕對唔會將睡夢中嘅你「轟」醒。
東芝12小時預校時間掣
外形似足日本至Hit嘅「快速銀河」系列,奶白色機身襯埋湖水藍嘅半透明機頂蓋,外形夠晒討好。功能上,至抵讚係備有1-12小時預校時間掣,洗衣機會喺選定時間內自動完成整個洗衣過程,自動熄機,瞓醒或者放工後就可以晾衫啦!

型號:東芝AW-9000SH
洗衣量:7.5公斤
乾衣速度:900轉
體積:W600×H986×D564mm
售價:約$3,480(各大電器行)
呢部機備有精算水位同花灑式沖洗系統2大功能,可根據衣物數量適當入水;而花灑式沖洗系統亦能以最少水洗淨衣物。
售賣點
日立(查詢電話:27700377)
金章(查詢電話:22621620)
華仁會電器(23980280)旺角花園街75-77號花園商業大廈5樓
東芝(查詢電話:29560222)
聲寶(查詢電話:28229435)