一年一度書展開鑼，大家都話旅遊書大熱，睇嚟就算港股近期越升越有，又話大媽、北水掃貨，財經投資書都未必大有市場，難怪資深投資專欄作家曾淵滄都話少為書展出書，加上今年股市實在係好旺，佢忙住周圍講talk、講seminar教人投資，都冇乜時間寫書咁話。
每年書展都係香港人嘅大事，不過曾淵滄就有另一番見解。佢認為去書展嘅人多數係後生仔同埋媽媽級，佢哋都係好有目標咁買書，所以「財經書喺書展唔會發揮任何作用」，佢亦好少為書展出書，舊年市淡比較多時間，佢就一口氣出咗7本財經書，「寫掂就出」，今年忙住講股，冇乜時間，至今只係出咗兩本，上月先出咗本《股識》。
佢認為唔多人走去買財經書係好事，因為如果越來越多人買有關投資股票嘅書，即係反映股市開始熱㗎喇。