當年今日
關於我們

潛龍碟影:死「口靚」仔學人車大炮 - 龍叔叔

蘋果日報 2015/01/30 00:00


上個禮拜俾齣《失蹤罪》震撼到,搞到龍叔叔好想搵隻動作片返屋企炸下,冇腦咁消磨番兩粒鐘。可惜臨近農曆新年,派碟未算積極,得《亡命救參》同《德古拉伯爵:血魔降生》叫有啲睇頭。碟舖老闆昌哥力推提早到貨嘅《戰逆豪情》,仲講笑咁話唔睇唔係男人喎!龍叔叔非軍事迷,從來都唔好二戰片種,印象最深刻嘅都係得《舒特拉的名單》、《雷霆救兵》同《敵對邊緣》幾齣經典作。但沉迷過PS遊戲《戰場女武神》系列之後,忽然對坦克車有股莫名嘅鍾愛。昌嫂知龍叔叔心意,就喺旁邊加把口話《戰逆豪情》號稱「坦克版雷霆救兵」,叫龍叔叔睇戲學下嘢喎。
戰爭片劇情唔會複雜得去邊,《戰逆豪情》都唔例外,講盟軍打到final stage,準備攻入德軍嘅最後陣地,KO埋希魔就爆機。乜人最恐怖?就係窮人同唔怕死嘅人,德軍垂死反擊,盟軍喺最後勝利之前,死傷無數。其中一支坦克縱隊,就係由男神畢彼特領軍,偏偏總部派咗個新丁擔當坦克副手。老兵同菜鳥,當然引發唔少理性同感性上嘅衝擊,加上導演講故仔嘅技巧不俗,五個大男人,以戰車Fury為家,不時出現幽默對白,同甘共苦,男人睇落特別有feel。
做乜逼我殺人
幾位主要角色,演起嚟稱職自然,最擔票房嘅畢彼特,佬味越嚟越重,做軍頭入型入格,影片初段佢最sharp。盧根利文飾演由打字員臨時拉夫上陣嘅新兵,喺《波西傑克森》擔正過,初段仍然稚氣未除,做菜鳥同樣稱職,果種死蠢同姐手姐腳,龍叔叔都忟到想煎佢兩巴。不過中段開始,身邊不斷有人死亡同受傷,新兵嘅成長過程充滿血腥同無奈,由死都唔肯開槍,逐步變成勇救同袍嘅英勇軍人,劇情推進快慢有序,當中嘅心理轉變,更加引人入勝。中段打後,比畢彼特更搶眼。戰友當中仲有《變形金剛》男主角沙拉保夫,滿臉鬍鬚揸槍殺敵man到爆,佢幾次遇險,龍叔叔總會無聊幻想佢大叫一聲:「Bumble Bee!」,跟手坦克變成大黃蜂退敵。睇嚟沙拉保夫要拍多幾套戰爭片,先可以洗脫《變形金剛》嘅定型。
empty
《戰逆豪情》港版BD(灣仔價約$250)
槍林彈雨 定位準確
由演員到戰爭場面,都算係荷李活A級製作,視覺上都幾刺激。不過呢類槍林彈雨嘅片種,聲效比畫面更重要,雖然港版BD未有提供Atmos同7.1聲道,實在有啲可惜,不過同時收錄咗DTS-HD MA同Dolby TrueHD 5.1,密集式槍聲相當清脆利落。尤其開首四架坦克怒轟兩台反坦克炮一幕,一班步兵匿喺坦克後面交火,槍聲定位合理,加上炮彈聲落力嘅重低音,眯埋眼都感受到戰場氣氛。細細聲播簡直浪費咗隻碟同音響,絕對係夜晚畀看更禁播嘅片種之一。Bonus算幾豐富,導演同演員專訪、製作特輯之外,仲有坦克背後嘅故事,原來係由英國南部嘅坦克博物館借出拍攝,軍事迷應該感受到導演嘅誠意。
Profile:龍叔叔
簡介:幾十歲老宅男,聽歌煲碟打機無一不癡,一生最大成就便是家中收藏幾千隻碟,假日只愛潛伏家中煲碟,親情跟愛情也拋諸碟後。 http://www.facebook.com/uncle.dragon.movie
empty