當年今日

馮仁昭四圍超:阿梅蒲吧偕猛男入搭少女出

蘋果日報 2002/01/08 00:00


梅艷芳(阿梅)舊年俾雜誌影到佢有個泰籍男友,感情生活似有着落。

否認結伴消遣
阿梅前晚又被撞見同幾位猛男,出現跑馬地BrsiWine&CocktailBar,佢哋玩到噚日凌晨時份,忽然曾同呂方傳緋聞嘅王敏慧(Marianne)出嚟,向記者遞上兩罐冰凍綠茶,佢重話:「阿姐(指梅艷芳)請你哋飲,阿姐話驚你哋辛苦食風喎!」其間,記者喺酒吧門外聽到阿梅同吧內男士猜枚嘅聲浪頗大。
大概一個鐘後,阿梅同Marianne出嚟。阿梅話:「我出嚟畀你哋交差。」問阿梅是否同猛男結伴消遣,佢只係搭着Marianne話:「邊有男仔,我同女仔嚟,我唔係飲咗好多(酒),頭先冇猜枚,玩骰盅之嘛。」
另外,阿梅否認同吳君如因電影《愛君如夢》而不和,佢話:「傳啫,呢個世界圓嘅!」

梁詠琪個唱真情流露
梁詠琪嘅三場演唱會圓滿結束,馮仁昭都有去捧場,覺得佢嘅現場氣氛搞得幾好,成個演唱會都好有誠意,而且GiGi嘅唱功比起佢初出道時進步咗好多,最難得嘅,係GiGi真情流露,台下嘅觀眾一定感覺得到。喺娛樂圈咁多年,仍然可以保持真性情,呢樣嘢其實好難得。
陳司翰被封師奶有段古
上年樂壇新人輩出,競爭的確好大,但咁又唔代表班新人歌手一定要做敵人,冇朋友做嘅,好似陳司翰同周永恒,呢兩個大細路平時會相約一齊行街,重互改花名㖭,周永恒叫陳司翰做「陳師奶」,陳司翰就叫周永恒做「周圍行」。
點解?陳司翰話:「可能我成日鍾意匿喺屋企,佢叫我去街我都唔想去,唔似得佢咁鍾意周圍行嘛。」

徐錦江為子入學賣樓
徐錦江近年專注進軍內地電影市場,為咗安居樂業同埋兒子徐菲可以入到好學校,佢舊年已經喺北京買咗間豪宅。點知佢近排同啲內地地產發展商朋友傾開,對方話佢手頭間豪宅附近冇乜嘢學校網絡。徐錦江太太好緊張兒子徐菲入學情況,佢日前同馮仁昭傾偈話:「我哋已另覓第二間屋,至於舊嗰間就平價賣番出去,大概蝕咗幾萬蚊。」

楊千嬅fans遇害心噏
日前港聞版報道有個十四歲嘅少女,懷疑被哥哥朋友因姦不遂用啞鈴扑死,後來得知佢生前係楊千嬅歌迷,問番千嬅,佢就皺住眉頭咁話:「我都睇咗段新聞,個心好唔舒服。希望警察快啲搵到真兇,死者安息啦!」