【下周襲港】粉絲表示心痛... Wanna One半百專輯被丟棄
Wanna One專輯
韓國人氣男團Wanna One將於下周六及日喺香港亞博館開騷,佢哋因為參加選秀節目《PRODUCE 101》而成為限定男團,並會於今年底解散。
而Wanna One趁住下半年就即爭取時間搵銀,當中除咗開世巡外,亦有出專輯,當中佢哋於今年6月推出嘅專輯就被發現遭粉絲丟喺路邊,有網民就拍下照片,發現被丟棄嘅專輯數量驚人,當中網民指起碼有50張專輯,而專輯基本上都係全新,只係拆咗包裝膠袋,專輯內嘅CD仍在內,表示購買者冇拎過張CD出來聽,值得留意係隨專輯送嘅Wanna One小卡就唔見咗。
上載照片嘅網友估計粉絲為咗可以儲齊全輯小卡,所以先一次過購買大量專輯,希望搏下機會睇吓可唔可以一次過儲齊所有小卡,可見死忠粉絲為咗儲齊成套小卡,不惜大花金錢購買專輯,但專輯數量太多,聽極最多都係一兩隻,加上現時聽歌都會依靠手機內音樂軟件聽,已經甚少歌迷會聽CD了,所以粉絲才會丟棄咁多張專輯。不過其他粉絲就表示心痛,覺得偶像嘅心血結晶就咁被人丟棄,粉絲表示好心痛,覺得粉絲就算屋企冇位放,都應該捐畀有需要嘅人。
更多韓流,喺晒《娛果》
http://fb.com/appledailyent