啱啱同岑杏賢宣佈分手嘅袁偉豪，分訊一出，就惹嚟唔少猜測，有傳岑杏賢迫婚變迫「分」，亦有傳因為袁偉豪異性緣太旺，加上又唔識避忌，所以咪搞到女友不滿。繼之前傳袁偉豪同黃智雯玩得太癲而搞到女友不滿後，今日又有周刊話龔嘉欣同樂瞳係分手導火線。

袁偉豪同岑杏賢相戀三年，但原來岑杏賢心目中，一直都有一條刺，報道所講嘅呢條刺就係龔嘉欣同樂瞳，有指袁偉豪同龔嘉欣合作拍攝劇集《師父明白了》時，男方已經好主動，試過約埋一齊學電單車，去完大馬做嘢之後，返香港仲不時WhatsApp調情。

至於樂瞳，報道就咁講樂瞳喺袁偉豪生日嘅時候，就主動買咗個蛋糕送去男方屋企一齊慶祝，結果搞到岑杏賢好唔開心，試過為咗呢件事同男友嘈交，但係袁偉豪覺得女友小事化大，仲話大家只係工作拍檔喎！

呢兩條刺一直埋喺岑杏賢個心入面，直至宣佈分手嘅前一晚，袁偉豪同岑杏賢做完台慶活動之後，同咗高海寧、唐詩詠仲有洪永城等人去咗坑口宵夜，但係佢哋兩個一直都冇乜交流兼面左左，報道仲話岑杏賢本來仲坐喺唐詩詠隔籬，直到洪永城到咗，岑杏賢先坐返埋去男友身邊。嗰餐飯雖然袁偉豪全程都對女友照顧有加，但係岑杏賢似乎就唔多領情，直到佢哋發現有記者影相，加上泰臣又不停製造搞笑氣氛，情況先有啲好轉。