經民聯今晚喺灣仔會展舉行成立5周年慶祝晚宴，唔少參選今屆人大代表選舉嘅建制派人士，都趁機到場拉票，互派寫明自己係人大選舉參選人嘅卡片，呼籲「多多支持」之聲不絕，令經民聯酒會尤如變成人大選舉拉票場。

其中最搶鏡，莫過於早前被傳不在西環祝福名單，但仍然去馬參選人大嘅前律師會會長林新強，皆因佢雖然早前「瞓厲頸」，要入醫院接受治療，但今晚仍然戴住頸箍堅持出席，仲同盛傳快將離任嘅律政司司長袁國強密斟同影相留念。

中聯辦副主任譚鐵牛亦有撐場。而特區政府方面，除咗娥特同現屆司局長畀面出席，唔少前局長都親身到賀，包括「民望高」高永文、蘇錦樑、陳家強同葉澍堃等，當然唔少得今屆人大熱爆新丁譚志源，繼續同不同嘉賓selfie一番。一班局長更應邀上台合唱《獅子山下》同《朋友》。