當年今日
關於我們

一味窩輪:文傳輪欠缺爆炸力

蘋果日報 2002/01/17 00:00


悶足成日,恒指全日高低波幅唔夠兩嚿,收市跌49點,成交再縮,得番60億元。窩輪市場更靜,10大升幅榜勉強夠數。畀多些少耐性啦,等多一個禮拜,新輪搶閘出籠,到時搵食點都容易啲。
是日成交最大嘅窩輪,係文化傳信公司輪714,成交金額37球,多過某啲藍籌股。正股(343)收51仙,再升3%,帶動714進帳9%,收24.4仙。
714行使價27仙,十分價內,5月9日到期,溢價只係0.8%,缺點係槓桿率愈縮愈細,得番2.1倍,冇乜爆炸力,如果再縮吓㖭,縮到1點幾倍嘅話,不如玩正股。不過,正股近期已經升咗好多,𠵱家至追,風險唔細。
跌輪榜冠軍,又係滙豐認購證1704。正股(005)反彈1格,收88元,1704卻由1.7仙跌落1仙,唔見41%。

1735博唔過
1704已屆末日,溢價仍高,跌得合理。另一件滙豐認購證1735是日升近5%,收8.8仙。呢件又係高危嘢,下月中到期,行使價102元,有排未到岸,唔使幾耐就輪到佢散。