編制超過三萬人嘅警隊近年醜聞無日無之，蛇王、欠債算小兒科，洩露機密資料只係家常便飯，強姦報案人真係無法無天，為咗挽救警隊形象，警隊誠信管理委員會推出《正直及誠實的品格行為指引》，提醒警員要時刻行得正企得正。
指引共有七大要點，包括一反、二不、三避免，仲有一項係要保護個人及機密資料。呢七項行為指引係老生常談，好似舉報貪污、不要濫用職權、避免同不良分子為伍等，八方相信隨時係學堂入門第一必修科，翻炒寫成指引，隆而重之明年2月推出，顯然係針對警員近年犯錯嘅補鑊功夫。
指引除七項要點，仲有「四問」，提醒警員做任何事前都應自問四個問題，就係所做事情合唔合法？是否符合警隊價值觀？會否影響公眾信心？有冇足夠理據解釋所作所為？如果是但一條問題答案係否，即係話該行為唔應該做。

特首揚言親疏有別

正所謂知易行難，警員跟足指引辦事固然係好事，只怕一味紙上談兵，實際上冇乜意義，如果要切實執行，八方建議一哥特警成日後遇到遊行集會、示威抗議事件時，先問問自己打壓市民手法有冇影響公眾對警隊信心或信任；批准放蛇、竊聽時，先諗清楚有冇違法，樣樣做到足先能夠上行下效，否則上樑不正，下樑自然歪。
警隊呢份指引，八方睇多兩睇，越覺值得玩味，可圈可點。警員要避免利益衝突，特首亦然，否則何來慳電膽券醜聞？公職人員要公正處事，不可歧視他人，但係點解煲呔又玩親疏有別呢？當差唔可以與不良分子交往，官商公然勾結又應該如何處理？煲呔自稱來自警察世家，爸爸係警察、細佬係警察、弟婦係警察，叔父、表兄弟都係警察，住喺警察宿舍18年，親戚朋友鄰居都係警察，應該自動自覺遵從呢份行為指引喎。
mailto:[email protected]

《正直及誠實的品格行為指引》

‧堅決反對並舉報貪污勾當及不當行為
‧除非為執行職務，避免與不良分子交往
‧不損害或濫用公職身份
‧避免公務上的利益衝突
‧保護個人及機密資料
‧以公正貫徹的態度處理事情，不可歧視他人
‧避免賭博無度、作高度投機性投資、過度借貸，及置身於無力償還債務的境況中
資料來源：《警聲》