白鴿黨日前帶雷曼苦主上街，有幾百人參加遊行，可見幾多人記得「有事都係要搵民主黨」呢句選舉口號。民建聯睇定先食，召集苦主後日上街，遊行本來係畀雷曼苦主參加，噚日下晝同金管局見面後，改為「控訴銀行不良推銷手法大遊行」。
民建聯議員陳鑑林話，雷曼迷你債券爆煲後，唔止持有迷你債券市民求助，唔少經銀行買入各種金融產品嘅小投資者都搵佢哋幫手，既然苦主眾多，一於大包圍，歡迎所有覺得遭銀行欺騙、誤導嘅市民參加。邊間銀行最多客戶中招呢？陳鑑林話暫時未有統計，當日有幾多人遊行亦未知，佢話越來越多人投訴銀行，反映監管可能有問題，稍後會約見其他監管機構商討如何改革。