當年今日
關於我們
【李八方online】林鄭現身港區無家者世盃 長毛梁粉同場
蘋果日報 2017/06/18 18:07
林鄭
無家者世界盃
「賽馬會無家者世界盃奧斯陸2017(香港區)」賽事今日舉行頒獎禮,候任特首林鄭月娥出席主禮。多年來幫手搞呢個活動嘅社區組織協會主任何喜華致辭時話,賽事舉行至今13年,但其實佢心底最希望係下年唔好再搞,因為意味香港再無露宿者。當然,佢知道現實同理想有距離,憶述03年有個官員同佢講,社會同政府要喺人在谷底時幫一把,係責任嚟,而講呢番話嘅正係林鄭。可惜過去兩年,理想同現實漸行漸遠,香港露宿者嘅人數上升,何話唔少露宿者都有工作,只因房屋問題嚴峻,唔少人要被迫露宿街頭,希望林鄭上場後可以改善。
林鄭自言一直好樂意出席無家者嘅活動,因為可以提醒佢,社會仲有咩問題未解決。另一個吸引佢出席嘅原因,正係不同政治立場嘅立法會議員都會現身,認為在關心基層上,唔同政治立場人士同政府都有空間合作,希望下屆政府施政能夠求共存異,爭取共識。講返個活動,今日議員隊代表落場嘅有社民連梁國雄、民主黨胡志偉、醫學界陳沛然同民建聯劉國勳,原來劉國勳係帶病上陣,佢朝早起身時有少少發燒,作感冒,但因為怕唔夠人落場,最後食咗成藥就頂硬上。