政府工一向吸引，即使只係合約職位，都一樣爭崩頭，如果大家學歷唔夠，申請唔到月薪8.6萬嘅中文撰稿主任，不妨考慮呢份無特別學歷要求嘅職位，講緊就係去財爺官邸做傭工，政務司司長辦公室最近透過公務員事務局同勞工處網站招聘呢個職位，呢份工人工唔算高，但入職門檻低，識得煮嘢食，能夠操流利粵語、簡單英文同普通話就基本過關，主要職責包括家居清潔、洗燙同宴會烹調，月薪有17,080元，工作期24個月，合約完成仲有10%人工嘅約滿酬金。

財爺官邸耐不耐都會請傭工，年初先公開招聘同一職位，當時月薪只得16,065元，未夠半年就加左6.3%人工，高過公務員薪酬加幅。如果你有3年喺大戶家庭或大型機構招待賓客嘅工作經驗，仲可以考慮申請財爺官邸高級管事一職，呢份工月薪有21,880元。人工高啲責任自然大啲，佢嘅工作仲要負責監督傭工做嘢同編更表。