陳奕迅（Eason）、楊千嬅、梁詠琪（GiGi）、蘇永康、張敬軒、林一峰及梁漢文，噚晚喺亞洲博覽館參予「拉闊思念會‧永恒的愛陳百強」演出，陳百強（Danny）胞姊、哥哥、契爺、張家輝、何超鳳、何超瓊、林二汶、馮寶寶等都有捧場。

現場播放咗Danny昔日演出過嘅電影及歌曲片段，歌迷不停大嗌：「Danny！」

大部份歌手均穿上Danny最愛的紫色衣服，大合唱一曲後，便由何超儀打頭陣獻唱《今宵多珍重》，佢穿上由「契爺」Danny廿多年前送贈嘅紅色舞衣獻唱。

之後GiGi、林一峰、梁漢文、張敬軒、陳奕迅等歌手輪流獻唱，蘇永康仲講咗段同Danny往事，佢話﹕ 「入行後好少接觸Danny，認識後講咗五十句嘢，三十句喺佢唔清醒情況講。記得有次出席朋友一個回教婚宴，冇酒、冇肉、冇乳豬，Danny坐喺我隔籬黑晒面，五分鐘後佢走去便利店攞住膠袋上嚟，買咗氈酒叫我陪佢飲，嗰三十句就係呢個唔清醒情況下講咗，一段日子後喺麗晶再見番佢，佢對我反應好冷淡，覺得佢係不折不扣藝術家，有藝術家脾氣，係獨一無二。」