王菲同霆鋒拍拖以嚟，間唔中就被影到結伴外遊，佢哋更加對日本情有獨鍾，8月先被網民爆佢哋去日本，似係慶祝阿菲生日，噚日又有大陸網民影到鋒菲喺日本機場，二人相當低調，據知霆鋒下周二(29號)生日，未知此行係唔係為咗同霆鋒慶祝呢(新聞連結： http://bit.ly/2tZ2rql )。

噚晚有網民聲稱夜晚偶遇霆鋒同王菲，相中見霆鋒戴上白色cap帽，身穿牛褲同牛仔褸，孭住黃色背囊，蹺住手排隊，而阿菲似乎刻意同霆鋒分開排，掩人耳目，身穿灰色鬆身衫嘅王菲着上黑色貼身褲，騷出纖瘦長腿，睇番張相見霆鋒同王菲一直低頭睇手機，雖然分開企，不過仍然用手機keep住傾。

而阿菲此行又係拎番上次同霆鋒外遊用過嘅帆布Cabas袋，對Celine情有獨鍾。