大使因為事忙，好耐都冇同大家見面，不過今日係○六年第一日，大使無論幾忙，點都要出嚟同各位親愛嘅讀者打個招呼，祝大家新年快樂，事事順境。

能幫人辛苦值得

時間真係過得好快，眨吓眼又一年，大使過去一年都做到冇停手，除咗要援助求助個案之外，每三個月又要審批社會服務機構嘅計劃書，同時處理超過一千五百份助學金申請，加上蘋果日報慈善基金上年又搞咗兩場骨髓驗血大行動，重加埋幾個大節活動，大使真係忙到氣咳，無一日得閒。但只要能夠幫到人，大使幾辛苦都覺得開心同值得。

派發賀歲禮物包

踏入○六年，大使「頭炮」嘅工作，就係喺農曆新年發放愛心。話咁快今個月尾就係過年，蘋果基金將會一如以往，資助社福機構喺農曆新年期間，為獨居長者、單親家庭、殘疾人士舉辦節日慶祝活動，例如免費請佢哋食一餐團年飯、派發賀歲禮物包等，希望佢哋能夠感受社會人士關懷，分享節日喜悅。
由即日起，蘋果基金接受社福機構申請資助舉辦團年飯活動，有興趣嘅團體，請盡快報名；與此同時，我哋嘅行動，亦好需要廣大善長支持，正所謂行善積福，請慷慨解囊。
查詢熱線︰29908688。
「賀歲禮物包」專戶捐款編號︰C0445
「蘋果愛心團年飯」專戶捐款編號︰C0425

服務熱線
電話：29908288
傳真：23702192
電郵：[email protected]