舊嘅唔去，新嘅唔嚟，中環舊政府總部（CGO）公務員陸續遷入添馬艦新總部，舊政府總部七樓飯堂亦會喺今日光榮結業。喺倒數一周嘅lunchtime，飯堂座無虛席，張張枱都被念舊公務員熟客仔訂咗，敍舊之餘又回憶一下那些年，尤其呢度嘅早餐仲賣緊廿蚊，平過中環、金鐘食肆一大截，加上夥計又親切，不時又有達官貴人幫襯，AO們唔捨得都好正常。

八方噚日都去緬懷一番，收銀May姐話自己雖然只做咗三年，但同啲客仔已經好熟，全部都似一家人，飯堂老闆早幾日仲同員工食飯farewell。佢話呢幾日閒閒哋每日有廿張枱係預訂，唔少AO專程由美利大廈或者新政府總部返嚟邊食邊影相。唔少高官都係捧場客，黎棟國、陳維安同立法會主席曾鈺成都會現身食平價飯，工聯會會長兼行會成員鄭耀棠亦不時嘆吓茶，升呢做咗政務司司長嘅林瑞麟間中都叫助手嚟買三文治醫肚，好多記者有時都喺呢度吹水收風㗎。

食衞局職員鄧小姐噚日都同一班同事擦餐勁，佢大讚員工verynice，一入嚟都知佢食開乜，蒸鯇魚係必食推介，大呻下星期一起唔知點算，事關出去食飯難搵位又貴到飛起。呢度小菜30幾蚊起，中式牛柳都係50蚊，質素雖然唔係頂級，但總算大件夾抵食。
舊政府總部飯堂喺董建華未將總部圍封之前，外人都可以自出自入幫襯，日日爆棚兼有點心賣。90年代尾，客人就以公務員為主，議員同記者間中幫襯。有行家話見過飯堂坐滿人，一邊係建制派，另一邊係民主派，中間坐咗幾個高官，有啲另類立法會feel㗎。

mailto:[email protected]